Ayeri y güei

N´Ast: Como bien decía´l sábadu (ver equí) Bernardo Busto, collaciu y perbuen Maestru onde los haya (¡Gonzalín espabila!), los baxos de los hórreos son auténticos museos -copiando´l títulu del gran discu Nuberu- de l´Asturies d´ayeri y güei. Baxo ún de la guapa aldea de montaña tebergana de Sobrevilla pudimos amirar un métodu tresporte d´anguañu y otru d´antanu. El d´antanu: yera una triba carretón que s´arrastraba p´acceder cola la carga a llugares onde los carros nun podíen, sobre tou en llugares de montaña. Cuando la cadarma taba fecha practicamente sólo del carretón nomábense rametos, emplegaos p´acarriar lleña principalmente. Si s´amestaben unes cadarmes apaecíes a una pasera madera, los estelos, nomábase ramu y servía pa tresportar herba, que quedaba suxetada polos estelos. Si lo que s´amestaba yera un cestu, polo xeneral de vares d´ablanu como´l de la semaya, el nome variaba munchu dependiendo la fastera (carretu, carreta, carreña, carriella, basnu, barnetu, basón o abasón) y tamién dalgo el diseñu. El so avíu pasaba ser el porte de cuchu, tierra, piedra... coses que necesitaren más cierre, llograu pola esquirpia, zardu o sardu, qu´asina d´estes formes pue nomase a la parede de vares d´ablanu que formen el cestu.

El tresporte d´anguañu nun necesita comentariu: xunir el coche y a correr.

En Cast: Como bien decía el sábado (ver aquí) Bernardo Busto, amigo y mejor Maestro donde los haya (¡Gonzalín espabila!), los bajos de los horreos son auténticos museos -copiando el título del gran disco de Nuberu- de la Asturias de ayer y hoy. Bajo uno de la bonita aldea de montaña tevergana de Sobrevilla, pudimos admirar un método de transporte actual y otro de antaño. El de antaño: era una especie de trineo que se arrastraba para acceder con la carga a lugares donde los carros no podían, sobre todo en lugares de montaña. Cuando la estructura estaba hecha de practicamente sólo el trineo se llamaban rametos, empleados para acarrear leña principalmente. Si se añadían unas estructuras parecidas a una escalera de madera, los estelos, se llamaba ramu y servía para transportar hierba, que quedaba sujetada por los estelos. Si lo que se añadía era un cesto, por lo general de varas de avellano como el de la foto, el nombre variaba mucho dependiendo de la zona (carretu, carreta, carreña, carriella, basnu, barnetu, basón o abasón) y también algo el diseño. Su utilidad pasaba a ser el transporte de estiércol, tierra, piedra...cosas que necesitaran más cierre, logrado por la esquirpia, zardu o sardu, que así de estas formas puede llamarse a la pared de varas de avellano que forman el cesto. El transporte actual no necesita comentario: unir al coche y a correr.